गुल्मीमा प्रहरी श्रीमती संघको वार्षिकोत्सवको अवसरमा मन्दिर सरसफाई
गुल्मी – गुल्मीमा नेपाल प्रहरी श्रीमती संघको ४१ औं वार्षिकोत्सवको अवसरमा मन्दिर परिसर सरसफाई गरिएको छ । आइतवार बिहान जिल्ला प्रहरी कार्यालय गुल्मी र नेपाल प्रहरी श्रीमती संघ गुल्मी शाखाको संयुक्त आयोजनामा रेसुङ्गा नगरपालिका – ८ स्थित भगवति मन्दिर परिसरमा सरसफाई गरिएको हो ।
धार्मिक स्थललाई सफा र स्वच्छ राख्न र समाजमा सकारात्मक सन्देश प्रवाह गर्नको लागी मन्दिर परिसर सरसफाई गरिएको जिल्ला प्रहरी कार्यालय गुल्मीका प्रहरी नायब उपरीक्षक (डिएसपी) गङ्गा बहादुर सारुले जानकारी दिए ।प्रहरी नायब उपरीक्षक सारुको कमाण्डमा खटिएको ४० जनाको समहुले मन्दिर परिसरमा रहेका पातपतिङर ,धुलो,कागज लगायतका फोहोर हटाउनुका साथै मन्दिरको प्रवेशद्वार सहित नजिकको सडक समेत सफा गरेको हो। जसले मन्दिर क्षेत्र सुन्दर र आकर्षक देखिएको छ ।
नेपाल प्रहरी श्रीमती संघले विगतदेखि नै सामाजिक जिम्मेवारी र उत्तरदायित्वका विभिन्न कार्यक्रम सन्चालन गर्दै आएको छ । संघले समाजमा सरसफाई, स्वास्थ्य सचेतना, शिक्षा, र आपतकालीन सहयोगजस्ता क्रियाकलापहरूलाई प्राथमिकता दिँदै आएको जनाएको छ।सामाजिक कार्यमा सघले लामो समयदेखि हिमाल पहाड र तराईका क्षेत्रमा विभिन्न कार्यक्रम गर्दै आएको पाइन्छ । यस किसिमका कार्यक्रमहरूले धार्मिक र सांस्कृतिक सम्पदाको संरक्षणमा मात्र नभई सरसफाई अभियानलाई व्यापकता दिन योगदान पुग्ने अपेक्षा गरिएको छ ।
यस भगवती मन्दिरमा घटस्थापना दिनदेखि नवमीसम्म दैनिक सन्ध्या आरतीसहित देवीको विशेष पुजाआरधाना हुने गर्दछ । मन्दिर व्यवस्थापन समितिका अध्यक्ष श्री प्रसाद भलामीका अनुसार वडा र चैतेदशैँ र अवसरमा नौ दिनसम्म मन्दिर परिसरमा पूजापाठ निरन्तर हुने र भक्तजनहरूको ठूलो भीड लाग्ने गर्दछ।
वडादशैको त्रयोदशीका दिन सराय नाच प्रस्तुत हुने गर्दछ । मन्दिरमा श्रदालुको धार्मिक आस्था र विश्वासका कारण यहाँ पुजा गर्नको लागी गुल्मी सहित आसपासका जिल्लाबाट समेत भक्तजन आउने गर्दछन । मनोकांङ्क्षा पुरा भएको भन्दै भक्तजनहरू बोली लिएर आउने प्रचलन रहेको अध्यक्ष भलामीले जानकारी दिए।
