गुल्मीमा घाँस काट्न गएकी महिलाको भीरबाट लडेर मृत्यु

गुल्मी – गुल्मीमा घाँस काट्ने क्रममा भीरबाट लडेर एक महिलाको मृत्यु भएको छ । जिल्लाको मदाने गाउँपालिका–६ स्थित घ्युउपानीकी ३१ वर्षीय लक्ष्मी थापाको मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक (डिएसपी) गङ्गा बहादुर सारुले जानकारी दिए ।

थापा बिहीवार दिउँसो स्थानीय काउले भालुखोला सामुदायिक वनमा घाँस काट्न गएकी थिईन् । तर, साँझसम्म पनि घर नफर्किएपछि परिवार र छिमेकीहरूले खोजी गर्दा किरा चौर भीरमुनी उनको शव फेला परेको थियो ।

प्रहरी उपरीक्षक सारुका अनुसार गाउँकै सामुदायिक वनमा घाँस काट्न गएकी लक्ष्मीको करिब १५–२० मिटर तल भीरमा थापाको मृत शव फेला परेको थियो । स्थानीय र घरपरिवारले खोजीको क्रममा थापालाई भीरमा लडेर मृत अवस्थामा देखेपछि उनीहरुले इलाका प्रहरी कार्यालय पुर्कोटदहमा खबर गरेका थिए । त्यसपछि प्रहरी निरीक्षक रेवन्त सेनको नेतृत्वमा ६ जनाको टोली घटनास्थल पुगेको थियो।

मृतक थापाका श्रीमान वैदेशिक रोजगारीमा रहेको प्रहरीले जनाएको छ । मृतक लक्ष्मीका दुई छोरा रहेका छन् । घटनाबारे थप अनुसन्धान भइरहेको प्रहरीले जनाएको छ।