दैनिक उपभोग्य सामग्री अभाव हुन नदिन प्रशासनको निर्देशन
गुल्मी – आगामी फागुन २१ गते हुने प्रतिनिधि सभा निर्वाचनलाई मध्यनजर गर्दै जिल्ला प्रशासन कार्यालय गुल्मीमा सरोकारवालासँग महत्वपूर्ण छलफल भएको छ । निर्वाचन अवधिमा जिल्लामा खाद्यान्न, औषधी, पेट्रोलियम पदार्थ लगायत अत्यावश्यक वस्तुहरुको अभाव हुन नदिन आवश्यक तयारीबारे विस्तृत छलफल गरिएको हो ।
बैठकमा हालको स्टक तथा आपूर्ति अवस्थाको समीक्षा गर्दै सम्बन्धित व्यवसायीहरुलाई पर्याप्त मौज्दात राख्न निर्देशन दिइएको छ । कुनै समस्या उत्पन्न भए तत्काल प्रशासनसँग समन्वय गर्न आग्रह गरिएको छ ।
त्यसैगरी गुल्मी उद्योग वाणिज्य संघ तथा चेम्बर अफ कमर्श ले जिल्लाभर अत्यावश्यक वस्तुहरुको सहज आपूर्ति सुनिश्चित गर्न आवश्यक समन्वय गर्ने प्रतिबद्धता जनाएको प्रमुख जिल्ला अधिकारी बद्रीनाथ गैरेले बताए । बजारमा कृत्रिम अभाव सिर्जना गर्ने, अस्वाभाविक मूल्यवृद्धि गर्ने, कालोबजारी गर्ने तथा अखाद्य वस्तु बिक्री वितरण गर्ने कार्यलाई कडाइका साथ नियन्त्रण गरिने निर्णय गरिएको छ ।
सुरक्षा तथा निर्वाचन अवधिमा हुन सक्ने दुरुपयोग रोक्न पेट्रोलियम पदार्थको खुला बिक्री वितरणमा निगरानी बढाइने प्रमुख जिल्ला अधिकारी गैरेले बताए । होटल व्यवसायीहरुलाई बास बस्ने व्यक्तिहरुको अनिवार्य अभिलेख राख्न तथा शंकास्पद गतिविधिमा सतर्क रहन निर्देशन दिइएको छ ।
निर्वाचन आचारसंहिता २०८२ पालना गर्दै निर्वाचन व्यवस्थापन कार्यमा सबै पक्षले सहयोग र सहजीकरण गर्ने निर्णय बैठकले गरेको गुल्मी प्रशासनले जनाएको छ ।
