विद्यार्थीका सुझाव संकलन गर्न एमालेले कार्यालयमा पेटिका राख्ने

काठमाडौं – नेकपा (एमाले)ले आफ्नो केन्द्रीय पार्टी कार्यालय, च्यासलमा विद्यार्थीका लागि सुझाव पेटिका राख्ने भएको छ ।

पार्टी अध्यक्ष एवं पूर्वप्रधानमन्त्री केपी शर्मा ओलीले सामाजिक सञ्जाल फेसबुक मार्फत सो जानकारी गराएका हुन् । अध्यक्ष ओलीले पार्टी कार्यालयमा विद्यार्थी भाइबहिनीहरुलाई पार्टीको बारेमा जानकारी मात्र दिने होइन कि सुझाव पनि लिने भनेर सुझाव पेटिका राख्न भनेको बताएका छन् । जुन सुझावहरु उनी आफैँ पनि पढ्ने र सोही अनुरुप चल्ने प्रयास गर्ने उल्लेख गरेका छन् ।

शुक्रबार फेसबुकमा लेख्दै अध्यक्ष ओलीले विद्यालयहरुले विद्यार्थीहरुलाई राजनीतिक दलका कार्यालय घुमाउने र केही जानकारी लिने चलन सुरु गरेको यो राम्रो सुरुवात भएको उल्लेख गरेका छन् ।

अध्यक्ष ओलीले भनेका छन्ः

विद्यार्थीका लागि सुझाव पेटिका !

आजभोलि विद्यालयहरुले विद्यार्थीहरुलाई राजनीतिक दलका कार्यालय घुमाउने र केही जानकारी लिने चलन सुरु गरेका रहेछन् । यो राम्रो सुरुवात हो । अस्ति म पार्टी कार्यालय गएको बेला संयोगले विद्यार्थीहरुसँग भेट भयो र उनीहरुसँग केही कुरा गर्ने अवसर मिल्यो । हाम्रो पार्टीका कार्यालय सचिवले वताए अनसार आजभोलि सातामा ४/५ वटा विद्यालयबाट विद्यार्थीहरु पार्टी कार्यालय अवलोकन गर्न आउँदा रहेछन् र यो क्रम बढ्दो छ । हो, यसरी नै हो हाम्रो देशको राजनीतिप्रति हाम्रा विद्यार्थीहरुको चासो र विश्वास बढाउने । र, भोलि उनीहरुलाई राजनीतिमा आउन प्रेरित गर्ने । हाम्रो पार्टी कार्यालयमा यी विद्यार्थी भाइबहिनीहरुलाई पार्टीको बारेमा जानकारी मात्र दिने होइन कि सुझाव पनि लिने भनेर सुझाव पेटिका राख्नु भनेको छु । जुन सुझावहरु म आफैं पनि पढ्ने छु र सोही अनुरुप चल्ने प्रयास हामी गर्ने छौं । अहिलेसम्म घुम्न आउनु भएका विद्यार्थी भाइबहिनीहरुका सुझावहरु के छन्, कमेन्ट बक्समा लेख्न सक्नु हुन्छ ।

शुभ विहानी ।

Good Friday !!