होटल व्यवसायी मञ्च मुसिकोटले उधारो नतिर्ने ग्राहकको नाम सार्वजनिक गर्ने

गुल्मी – होटल व्यवसायी मञ्च मुसिकोटले उधारो नियन्त्रण अभियान अन्तर्गत पटक पटक जानकारी गराउँदा पनि उधारो भुक्तान नगर्ने ग्राहकहरुको नाम सार्वजनिक गर्ने भएको छ ।

मञ्चले गत वर्षदेखि थालेको उधारो नियन्त्रण अभियान अन्तर्गत उधारो नतिर्ने ग्राहकहरुको विवरण संकलन गरेको थियो । उक्त विवरणका आधारमा वडा नं २, ३, ६ र ७ नं वडाबाट व्यवसायीहरुले उधारो नतिर्ने ग्राहकहरुको विवरण मञ्चलाई दिएका थिए ।

ती निवेदनका आधारमा उधारो नतिर्ने ग्राहकहरुलाई फोन गर्ने र पत्राचार गर्ने गरेपछि केही ग्राहकहरुले भने उधारो भुक्तान गरेका थिए । तर अझैपनि केही ग्राहकहरुबाट पूणर् रुपमा उधारो असुल नभएपछि फोटो सहितको विवरण नै सार्वजनिक गर्न लागिएको होटल व्यवसायी मञ्च मुसिकोटका अध्यक्ष विवेक काफ्लेले जानकारी दिनुभयो ।

लामो समयदेखि उधारो नतिर्ने ग्राहकहरुलाई अन्तिम समय दिने र त्यस्ता ग्राहकहरुको फोटो सहितको नामावली सार्वजनिक गर्ने तैयारी भईरहेको उहाँको भनाई छ ।

अहिलेसम्म विभिन्न वडाबाट झण्डै १० जना ग्राहकहरुले विभिन्न समयमा जानकारी गराउँदा पनि उधारो भुक्तान नगरेपछि होटल व्यवसायीहरुलाई परेको मर्कालाई लक्षित गरी उनीहरुको नामावली सार्वजनिक गर्न बाध्य बनेको उहाँले बताउनुभयो ।

उधारो नियन्त्रण अभियान अन्तर्गत उधारो मुक्त नगरपालिका बनाउन पहल थालिरहेको भन्दै उहाँले उधारो कारोबारलाई पूणर् रुपमा बन्द गराउन व्यवसायीहरुबीच विभिन्न समयमा छलफल तथा अन्तरक्रिया समेत भईरहेको जानकारी दिनुभयो । काफ्लेका अनुसार भदौ देखि नगरपालिकामा रहेका होटलहरुमा नयाँ मूल्य सूची कायम गर्ने र सोही अनुसार कारोबार गर्नेछन् ।स्रोत : जिटिभी नेपाल