डाक्टरले शिशुलाई पाँच लाखमा विक्री गरिदिएपछि ……

काठमाडौं – मृत्यु शैय्यामा पुगेको विरामीलाई जिबन्त बनाउछन् अनि हामी चिकित्सक (डाक्टर) लाई भगवान समान मान्छौ । हो धेरै चिकित्सक (डाक्टर) भगवानकै रुपमा छन् । उनीहरु रात दिन विरामीकै सेवामा लागेका छन् । धेरैलाई मृत्यु शैय्याबाट बचाएका छन् । तर पछिल्लो समयमा केही चिकित्सकहरु बिरामी सेवामा होइन कसरी पैसा कमाउने भनेर नाफा कमाउने कालो धन्दामा लागेको पाइन्छ । यसैका उदाहरण हुन् कोशी अस्पताल विराटनगरका पूर्वमेडिकल सुपरिटेन्डेन्ट डा. तपेश्वरलाल कर्ण ।

डा. कर्णको कालो धन्दा भनेको विगतदेखि अवैध सम्बन्धबाट जन्मिएका शिशुको बिक्री गर्ने । उनले केही दिनअघि अवैध सम्बन्धबाट जन्मेकी शिशु (छोरी) निःसन्तान दम्पतीलाई ५ लाख रुपैयाँमा बिक्री गरेको पत्ता लागेपछि प्रहरीले डा. कर्णसहित शिशुका अविवाहित बाबुलाई पक्राउ गरेको छ ।

भोजपुर हतुवागढी ४ घर भएका २७ वर्षीय अविवाहित गोविन्द राई र उनकी प्रेमिका २६ वर्षीया युवतीको सम्बन्धबाट जन्मिएको शिशुलाई डा. कर्णले मोरङको काटहरी गाउँपालिका २ आर्दश टोलका सूर्यनारायण राजवंशी दम्पतीलाई ५ लाख रुपैयाँमा बिक्री गरेका थिए । तर, प्रहरीले चाल पाएपछि बच्चा खरिद गर्ने सूर्यनारायण, उनकी पत्नी श्यामवती, आमा दिलमाया र दिदी सुधा राजवंशीलाई पनि प्रहरीले अनुसन्धानका लागि नियन्त्रणमा लिएको छ ।

यसरी भयो घटना

असार १४ गते ग्रिनक्रस अस्पतालमा सामान्य रुपमा शिशुको जन्म भएयो । त्यहाँका नर्सका अनुसार शिशुको तौल जन्मिदा २ केजी थियो तर, डा. कर्णले शिशुको तौल ९ सय ५० ग्राम मात्र भएको र धरान वा विराट नर्सिङ होममा थप उपचार गर्न लैजाने भन्दै नाम परिवर्तन गराएर बिक्री गरेका थिए । प्रेमी गोविन्दले उनकी प्रेमिकालाई असार १३ गते ग्रिनक्रस अस्पताल नजिकैको दिपेश मेडिकल क्लिनिकमा डा. कर्णको सल्लाहबमोजिम पुगे । त्यहाँ लगेर डा. कर्णले युवक र युवती दुवैको नाम र ठेगाना परिवर्तन गराएर क्लिनिककी सहयोगमार्फत अस्पताल भर्ना गराए ।

डा. कर्णको सल्लाह अनुसार नाम परिवर्तन भएपछि अहिले अस्पतालको रेकर्डमा युवकको नाम मानबहादुर तामाङ र युवतीको नाम फूलकुमारी तामाङ र ठेगाना सुनसरीको रामधुनी ११ भनेर उल्लेख छ । तर, सुनसरीको रामधुनीमा वडा नम्बर ११ नै छैन । गर्भवती युवतीलाई अस्पतालमा हुँदा तीनै क्लिनिकबाट डा. कर्णले खटाएकी निरु भनिने निरु यादवले रेखदेख गरेको प्रहरी अनुसन्धान खुलेको छ । अस्पतालका नर्सहरुभन्दा निरु नै बेसी खट्थिन् । औषधि पनि आफै क्लिनिकबाट लिएर आउँथिन् । १४ गते बिहान ८ बजेतिर गर्भवती युवतीको डेलिभरी भयो । निरु आफैँले डेलिभरी गराएकी थिइन् । डेलिभरीपछि डा. कर्ण अस्पताल आइपुगे र निरुले शिशुलाई सुधाको हातमा थमाइदिइन् ।