बजारमा दैनिक उपभोग्य बस्तुको मुल्य चुलिदैँ : मार खेप्दै उपभोक्ता

गुल्मी – पछिल्लो समय बजारमा दैनिक उपभोग्य वस्तुको भाउ बढ्न थालेपछि उपभोक्ता मारमा छन् । यतिबेला बजारमा दैनिक उपभोग गर्ने बस्तुको मूल्य आकाशिदै गएपछि यसको मार खेप्न उपभोक्ता बाध्य छन् । बजारमा टमाटर , प्याज  गोलभेडा , जिरा , चामल लगायत दैनिक उपभोग गर्ने वस्तुको भाउ महँगिएको छ ।

उपभोक्ताको माग अनुसारको उत्पादन नहुँदा गोलभेडाको भाउ दिनहुँ बढ्दै गएको हो । अहिले बजारमा टमाटर प्रतिकेजी २ सय , प्याज १ सय ८० रुपैयाँ , जिरा १ हजार २ सय ,गोलभेडा किलोको एक सय ८० रुपैयाँसम्म पुगेको छ । भारतले निर्यातमा प्रतिबन्ध लगाएको बहाना बनाउँदै व्यापारीले पहिल्यै आयात गरिसकेको चामलसमेत मूल्य बढाएका छन् ।

२० किलो प्रतिबोरा चामलको भाउ तीन सय रुपैयाँसम्म बढेको छ । वाणिज्य, आपूर्ति तथा उपभोक्ता संरक्षण विभागले गरेको अनुगमनमा समेत व्यवसायीले चामलमा अत्यधिक मूल्य बढाएको पाइएको छ । यस्तै, बजारमा जीराको भाउ समेत अचाक्ली बढेको छ । तीन महिना पहिला आठ सय प्रतिकिलोमा पाइने जीरा अहिले एक हजार चार सय रुपैयाँसम्म पुगेको छ । तर, पनि सरकारले मूल्यवृद्धि नियन्त्रण गर्न सकेको छैन ।