गुल्मीको इस्माले वडा तहमै पुगेर दियो अपांगता परिचयपत्र

अनिल खत्री / गुल्मी – गुल्मी जिल्लाको इस्मा गाउँपालिकाले वडा तहमै पुगेर अपांगता परिचयपत्र वितरण तथा नविकरण सुरु गरेको छ । गाउँपालिकाले वडानम्बर १ बाट अभियान वडानम्बर ६ सम्म पुगेर सकिने छ ।पालिका भित्रका ६ वटै वडामा पुगेर अपांगता भएका नागरिकलाई नयाँ परिचयपत्र वितरण गरिने भएको गाउँपालिकाका उपाध्यक्ष पार्वती कुँवरले बताइन । पालिकामा यश अघि वितरण गरिएको अपांगता परिचयपत्र केही त्रुटी भएको गुनासो आएपछि वडा तहमै पुगेर नविकरण पनि गर्न थालिएको कुँवरले बताइन् ।

वास्ताबिक अपांगता भएका नागरिक नछुटुन र गैर अपांगताले फाइदा नलिउन भन्ने उदेश्यले अपांगता परिचयपत्र वितरण र नविकरण गर्न वडा तहबाट अभियान चलाइएको कुँवरले बताइन ।वडातहमा रहेका वितरण समितिबाट कार्यबिधिमा रहेर सिफारिसका आधारमा अपांगता परिचयपत्र वितरण गरिदै आएको छ । यसरी वितरण गरिने परिचयपत्रमा पनि केहि तलमाथी गराउने कार्य भएको भन्ने गुनासो आइरहेको छ ।

अपांगता परिचयपत्र वितरणमा केही गुनासो देखिएकाले नविकरणमा कढाइ गरिएको गाउँपालिका अध्यक्ष भगतसिंह खड्काले बताए । अपांगता परिचयपत्र पाएका नागरिक सपाङ्गले जस्तै काम गर्ने गरेको भन्ने गुनासो आएको अध्यक्ष खड्काले बताए ।पालिकाले कार्यबिधी भन्दा बाहिर रहेर वितरण गरिएका त्यस्ता परिचयपत्र फेला पारे नविकरण नगर्ने जनाएको छ ।