गुल्मीमा दुई एग्रोभेट सेन्टर सिल

गुल्मी – जिल्ला प्रशासन कार्यालय गुल्मीले नियमविपरीत संचालन भएका दुई एग्रोभेट सेन्टरमा सिल गरेको छ । आइतबार जिल्लाको सदरमुकाम तम्घास उढिङढुङ्गामा अवस्थित दुर्गा एग्रोभेट सेन्टर र मुसिकोट एग्रोभेट सेन्टरलाई सिल गरिएको जिल्ला प्रशासन कार्यालय गुल्मीले जनाएको छ ।

जिल्ला प्रशासन कार्यालय गुल्मीका प्रशासकीय अधिकृत दिनेश ज्ञवालीको नेतृत्वमा खटिएको टोलीले नियमविपरित संचालन भईरहेका उक्त एग्रोभेट सेन्टर सिल गरेको हो । केही समय पहिले औसधि व्यवस्था विभागले दुवै एग्रोभेट सेन्टरको अनुगमन गरी र इजाजत पत्र लिन अनुरोध गरेको थियो । तर, संचालकले अटेरी गरेर संचालन प्रमाणपत्र नलिएपछी उक्त एग्रोभेट सेन्टर सिल गरिएको टोलीका नेतृत्वकर्ता दिनेश ज्ञवालीले जानकारी दिएका छन् ।

तम्घास बजारमा विगत केही बर्षदेखि दुर्गा एग्रोभेट सेन्टर संचालनमा छ भने मुसिकोट एग्रोभेट सेन्टर चार महिनादेखि संचालनमा छ । रेसुंगा नगरपालिका वडा नम्बर २ का वडाध्यक्ष हीराबहादुर थापा, भेटेरिनरी अस्पताल तथा पशु सेवा विज्ञ केन्द्र, प्रहरी र पत्रकार समेतको उपस्थितीमा एग्रोभेट सेन्टर सिल गरिएको हो । एग्रोभेट सेन्टरको आवश्यक अनुसन्धानपछि थप निर्णय हुने जिल्ला प्रशासन कार्यालय गुल्मीले जनाएको छ ।