गुल्मीको मालिका गाउँपालिकाले भैंसीलाई सुत्केरी भत्ता दिने

गुल्मी –गुल्मीको मालिका गाउँपालिकाले पहिलो बेत ब्याउने भैंसीलाई सुत्केरी भत्ता वितरण गर्ने भएको छ । गाउँपालिकाको पशुशाखा अन्तर्गत आर्थिक बर्ष २०८०/०८१ को बार्षिक स्वीकृति कार्यक्रम अनुसार पहिलो बेत ब्याउने भैंसीलाई सुत्केरी भत्ता उपलब्ध गराउन लागेको गाउँपालिकाले जनाएको छ ।

सुत्केरी भत्ता प्राप्त गर्न चाहाने पशुपालक कृषकलाई केन्द्रित गर्दै मालिका गाउँपालिका–८ कार्यालयले मंगलबार सातदिने एक सूचना जारी गरेको छ । यस आर्थिक बर्षको साउन एक गतेदेखि ब्याएका भैंसीका कृषकलाई निबेदन माग गरिएको छ ।

साउन १ गतेयता भ्याएका भैसी पालक कृषकले निवेदन दिन सक्ने सूचनामा उल्लेख गरिएको छ ।सुत्केरी भत्ता लिन चाहाने  कृषकले निवेदन,वडा कार्यालयको सिफारिस,भैंसीधनीको चेकको फोटोकपी,नागरिकताको प्रतिलिपी,सुत्केरी भैंसीसंगै खिचिएको फोटो लगायतका कागजात माग गरिएको छ ।

कार्यालयका अनुसार कृषकको घरमै जन्मेको भैंसीको पाडी पहिलो बेत घरमै ब्याएको हुनुपर्ने छ । कम्तिमा तीन जना छिमेकी साँची बसेर मुचुल्का गनुपर्ने समेत कार्यालयले जनाएको छ । वडाध्यक्ष सुर्य बहादुर घर्ती क्षेत्रीद्धारा हस्ताक्षरित सूचनामा सुत्केरी भैंसीलाई के कति भत्ता दिने भन्नेबारे केही खुलाईएको छैन् । भैंसीलाईसुत्केरी भत्ता दिने सूचना सार्वजानिक भएलगत्तै सामाजिक संजाल नै तातेको छ ।