गुल्मीको रुरुक्षेत्रमा पर्यटक जोड्दै हनुमान शीला

गुल्मी – गुल्मी,पाल्पा र स्याङ्जाको संगम स्थल रूरूक्षेत्रमा रहेको हनुमान शीलाले पूनर्जीवन पाएको छ । रिडीको तिनमुखे पुलबाट स्याङ्जातर्फको भीरमा रहेको हनुमान थानलाइ सामाजिक सञ्जाल मार्फत् आर्थिक संकलन गरेर पुनर्निर्माण गरिएको हो ।

अहिले सो हनुमान शीलालाइ पूर्ण आकृति दिएर सजाइएको छ। भने वरिपरि रेलिङ् ,घण्टीहरु राखिएको रिडीका युवा अभियान्ता सुन्दर कसजूले बताए ।

हनुमान थानलाइ रंगरोगनपछि सो क्षेत्रको नयाँ धार्मिक एवम पर्यटकीय गन्तब्यका रुपमा विकास भैरहेको छ । अहिले यहाँ दैनिक सयौँ मानिस हनुमानको दर्शन गर्न जान थालेका छन् । तीनमुखे पुल बनेपछि यसको सौन्दर्यता र महत्व अझै बढेको छ भने आवत जावतमा सहजता थपिएको छ ।

हनुमान थानको रुपमा मात्र सिमित रहेको सो स्थानलाइ अब वाटिकाको रुपमा बिकसित गर्दै लैजाने योजना अनुरुप अब राम र सीताको मूर्ति बनाएर हनुमान वाटीका नामाङ्कन गरिनेछ ।

यो पुर्ननिर्माण अभियानका लागि देश तथा बिदेशबाट दाताहरु मार्फत् करिब ८ लाख रुपैया संकलन भएको कसजूले जानकारी दिए ।