मृगौला रोगबारे गुल्मीमा सचेतनामुलक कार्यक्रम



गुल्मी – जनतालाई स्वास्थ्य क्षेत्रमा योगदान दिने उदेश्य सहित गुल्मीमा मृगौला रोग सम्बन्धी सचेतनामुलक कार्यक्रम गरिएको छ । जिल्लाको सदरमुकाम तम्घास स्थित शुभलक्ष्मी फर्माले सामाजिक उत्तरदायित्व अन्तर्गत स्वास्थ्यकर्मी र डाक्टरसँग मृगौला रोग सम्बन्धी सचेतनामुलक कार्यक्रम गरेको छ । खानपान र समय समयमा स्वास्थ्य परीक्षण नगर्दा पछिल्लो समय विभिन्न कारणले मृगौला रोग र यसका बिरामी बढ्दै गएको शुभलक्ष्मी फर्माका व्यवस्थापक होमबहादुर पल्ली मगरले जानकारी दिए ।

मृगौला रोगका बिरामीमा देखिन लक्षण र समस्या समाधानमा बारेमा स्वास्थ्यकर्मी मार्फत नागरिकलाई जानकारी दिने उदेश्यले सचेतनामुलक कार्यक्रम आयोजना गरिएको व्यावस्थापक पल्लीले बताए । शुक्रबार मृगौला रोग विशेषज्ञ डाक्टर कृष्णकुमार अग्रवाल र जिल्लास्थित संचारकर्मी बिच अन्तरक्रिया गरिएको छ । त्यस्तै होटल पौवा रेसुंगामा जिल्लाका स्वास्थ्यकर्मी र डाक्टरसँग मृगौला रोग सम्बन्धी सचेतनामुलक कार्यक्रम गरिएको फर्माले जनाएको छ ।


Advertisement

स्वास्थ्यकर्मीले बिरामी र संचारकर्मीले दर्शक र स्रोतामाझ सूचना प्रवाह गरी नागरिकलाई मृगौला रोगका लक्षण र यसबाट बच्ने उपाय सहित सचेतना फैलाउन यो कार्यक्रम गरिएको व्यावस्थापक पल्लीको भनाई छ । अनुहार सुन्निनु,अरुचि हुनु,वाकवाकी लाग्नु उल्टी हुनु,उच्च रक्तचाप,रक्तअल्पता र कमजोरी,पिसाब पोल्ने,पिसाब लागिरहने,पिसाबबाट रगत र पिप निस्कनु, खुट्टा सुन्निनु, आँखा वरिपरिको भाग सुनिनु, खाना मन नलाग्नु मृगौला रोगका लक्षण रहेको विशेषज्ञ डाक्टर कृष्णकुमार अग्रवालले जानकारी दिए ।

विशेषज्ञ डाक्टर अग्रवालका अनुसार एक सय जना बिरामीमध्ये ३ जनामा डायलायसिस गर्नुपर्ने र यो रोग ५० प्रतिशतमा मात्र देखापर्दछ । रोजगारीका लागि खाडी मूलकमा गएर स्वदेश फर्किएका युवाहरूमा यो रोग बढी देखा पर्ने गरेकाले यसको थप अनुसन्धानकै क्रममा रहेको उनले बताए । उपचार पछि निको हुने गरेकाले नआत्तिन र सजग रहन आग्रह गर्दै उनले विश्वब्यापीरुपमा मृत्यु हुनेको कारण मध्ये पाँचौँ नम्बरमा यो रोग पनि रहेको बताए ।

रक्तचाप र मधुमेहको नियमित परीक्षण, वर्षको एक पटक रगत, पिसाबको जाँच गर्ने ,प्रशस्त मात्रामा पानी पिउने, जथाभावी औषधि सेवन नगने सन्तुलित आहारको सेवन गर्ने र नियमित शारीरिक व्यायाम गर्ने गरेमा मृगौला रोगबाट बच्च सकिन्छ ।

विश्व स्वास्थ्य संगठनले मार्च १० लाई बिश्व मृगौला दिवसको रुपमा मनाउने घोषणा गरेसँगै नेपालमा पनि हरेक वर्ष यो दिवस मनाउन थालिएको छ । मृगौला रोगको,यसका लक्षण र बच्ने उपायबारे गाउँबस्तीमै पुगेर नागरिकलाई सचेतनामुल कार्यक्रम गर्न जरुरी देखिन्छ ।

यो पढेपछि तपाईलाई कस्तो लाग्यो ?


मनोज कार्की
कार्की गुल्मी खबरका संचालक हुन् । समसामयिक विषयमा कलम चलाउँदै आएका कार्कीले गुल्मी लगाएत आसपासका क्षेत्रबाट विभिन्न विषयहरुमा रिपोर्टिङ गर्दै आएका छन् ।

Advertisement
विज्ञापन