गुल्मीको सिलादीमा आगलागीबाट एक घर जल्यो

गुल्मी – गुल्मीको मालिका गाउँपालिका – ७ घमिर सिलादीको एउटा घरमा शनिबार राति आगलागी भएको छ । आगोले स्थानीय गोठी सुनारको घर जलेको हो । राती एक्कासि घर जल्दा तीन लाख बराबरको क्षति भएको जिल्ला प्रहरी कार्यालय गुल्मीले जनाएको छ ।

सुनारको ढुङ्गा, माटोले बनेको र  खरको छानो भएको २ तले कच्ची घरमा  राति १०:३० बजेतिर आगोलागी भएको हो । आगलागी घटनाको खबर पाएपछि  मर्भुङ्ग प्रहरी चौकीका प्रहरी सहायक निरीक्षक दिपक शाहको कमाण्डमा प्रहरी टाेली घटनास्थलमा पुगेको थियो । प्रहरी र स्थानीयको सहयोगमा आगो नियन्त्रणमा लिइएको थियो ।

आगलागीबाट घर पुर्णरुपमा क्षति भएको छ भने घरभित्र राखिएकोअन्नपात, काठदाउरा, लत्ताकपडा, नागरिकता, लालपुर्जा र  नगद ३० हजार जलेर नष्ट भएको जिल्ला प्रहरी कार्यालय गुल्मीका सूचना अधिकारी तथा प्रहरी नायब उपरीक्षक शंकर पोखरेलले जानकारी दिए ।

प्रहरी नायब उपरीक्षक पोखरेलका अनुसार घटनामा मानवीय र चौपाया क्षति भएको छैन । घमिर सिलादीमा १६ घरपरिवार सुकुम्बासी लामो समयदेखि बस्दै आएका छन् । सुनार पनि सुकुम्बासी हुन् । उनी घरमा एक्लै बस्दै आएकी थिइन् ।

घर जलेर पुर्ण क्षति भएपछि सुनार छोराको घरमा बसेकि छन् । केहिदिन यता लगातार भइरहेको अविरल बर्षाका कारण आगोले ठुलो क्षति बाट बस्ती नै बचेको स्थानीयको भनाइ छ ।आगलागी घटनाबारे थप अनुसन्धान भइरहेको प्रहरीले जनाएको छ ।