गुल्मीमा निस्ती खोलाले बगाएर एक युवा बेपत्ता
गुल्मी – गुल्मीमा निस्ती खोलाले बगाएर एक युवा बेपत्ता भएका छन् । जिल्लाको मुसिकोट नगरपालिका – २ का ३१ वर्षका बोमबहादुर कार्की बेपत्ता भएको जिल्ला प्रहरी कार्यालय गुल्मीले जनाएको छ ।
शनिबार दिनभर खेतको काम सकेर बेलुका घर फर्कने क्रममा कार्कीलाई निस्ती खोलाले बगाएको आफन्तले बताएका छन् । निस्ती खोलामा पानीको बहाव बढेकाले उनलाई बगाएर बेपत्ता पारेको बताइएको छ ।
कार्की मुसिकोट नगरपालिका -१ अरेवाका स्थायी बासिन्दा हुन् । तर उनी बिगत केही समयदेखि सोही नगरपालिकाको -२ निस्ती स्थित मामाघरमा बस्दै आएका थिए । बेपत्ता भएका कार्की ´ख`वर्गका अपाङ्गता रहेको जिल्ला प्रहरी कार्यालय गुल्मीका प्रहरी नायव उपरीक्षक शंकर पोखरेलले जानकारी दिए । उनी अविवाहित हुन् ।
कार्की शनिबार बेलुका बेपत्ता भएपनि आफन्तले आइतबार बिहान प्रहरीलाई खबर गरेका थिए । खबर प्राप्त भएलगत्तै उनको प्रहरी र स्थानीयले खोजी कार्य गरिरहेको प्रहरीले जनाएको छ ।
