गुल्मीमा आगो ताप्ने क्रममा जलेर एक वृद्धको मृत्यु

गुल्मी – आगो ताप्ने क्रममा जलेर गुल्मीमा ८० वर्षीय वृद्धको मृत्यु भएको छ । जिल्लाको धुर्कोट गाउँपालिका – ७ वाग्ला निवासी  इन्द्रलाल गिरीको मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक (डिएसपी) चिरञ्जीवी दाहालले जानकारी दिए।

प्रहरी नायब उपरीक्षक दाहालका अनुसार गिरी सोमबार राती साढे ९ बजे आफ्नै घरमा आगो ताप्ने क्रममा आगोले जलेका थिए । आगोले जली दाजुको मृत्यु भएको खबर भाई टेकराज गिरीले प्रहरीलाई खबर गराएका थिए ।

घटनाको खबर प्राप्त भएलगत्तै प्रहरी सहायक निरीक्षक तिलक नेपालीको कमाण्डमा ३ जनाको टोली घटनास्थल पुगेको थियो । मृतक गिरीको घर परिवारमा उनी र भाई मात्र रहेको प्रहरीले जनाएको छ । घटनाबारे थप अनुसन्धानका लागि जिल्ला प्रहरी कार्यालय गुल्मीबाट प्रहरी निरीक्षक रामकुमार थापाको कमान्डमा प्रहरी खटिएको छ ।