गुल्मीमा जेसिबीले पल्टाएको ढुंगाले लाग्दा बालिकाको मृत्यु

गुल्मी – गुल्मीमा जेसीबीले पल्टाएको ढुंगाले लागेर आठ वर्षीय बालिकाको मृत्यु भएको छ । जिल्लाको इस्मा गाउँपालिका–२ छल्दीटार निवासी बिष्णु कुमालको मृत्युु भएको जिल्ला प्रहरी कार्यालय गुल्मीका प्रहरी नायब उपरीक्षक (डिएसपी) चिरञ्जीवी दाहालले जानकारी दिए ।

आइतबार बिहान विद्यालय हिडेकी कुमाललाई श्रेष्ठ कन्ट्रक्सन प्रालिको लु १ क ४३८६ नम्बर जेसिबीले पल्टाएको ढुंगाले लागेको थियो । छल्दीबाट हस्तीचौर जाने भित्री कच्ची सडक खन्ने क्रममा  ढुंगाले लागेर बालिका गम्भीर घाइते भएकी थिइन् ।  उनको समयमै उद्धार समेत हुन नसकेको स्थानीयले बताए । गम्भीर घाइते भएकी बालिकाको गुल्मी अस्पतालमा उपचार गर्न ल्याइएको थियो । तर,डाक्टरले बालिकालाई मृत घोषणा गरेका थिए ।

निर्माण व्यवसायीको चरम लापरवाहीका कारणले बालिकाको मृत्यु भएको स्थानीयले आरोप लगाएका छन् । त्यस सडकमा  विगत ३ वर्षदेखि सडक निर्माण तथा स्तरउन्नतिको काम हुँदै आएको छ । सडकमा निर्माणको काम पनि अत्यन्तै सुस्त गतिमा भएको पाइएको छ ।

श्रेष्ठ कन्ट्रक्सनले सडक बिस्तार गर्दा तल कुनै जानकारी नदिइ मनलाग्दी समयमा ढुंगा फाल्ने गरेकाले पनि बालिकाको ज्यान गएको स्थानीयले बताएका छन् ।

जेसिबी चालक मकवानपुर इन्द्रचौर गाउँपालिका– ४ सिस्नेरीका ३६ वर्षीय राजेश रेग्मीलाई प्रहरीले नियन्त्रणमा लिएको छ। बालिकाले घर नजिकै को  पालुखा माध्यमिक विद्यालयमा अध्ययन गर्दै आएकी छिन् । अहिले बालिकाको शव गुल्मी अस्पतालमा राखिएको छ । घटनाबारे थप अनुसन्धान भइरहेको प्रहरीले जनाएको छ ।