गुल्मीको रुरुक्षेत्रमा ऐतिहासिक लाखे महोत्सव हुने

ईश्वरी बस्याल/ गुल्मी – गुल्मीको रुरुक्षेत्रमा ऐतिहासिक लाखे महोत्सव तथा प्रतियोगिता हुने भएको छ । नेवा: देय दवु:गुल्मीको आयोजनामा आगामी मंसिर ९ गते प्रदेशस्तरीय लाखे महोत्सव हुन लागेको हो । महोत्सवसँगै लाखे नाच प्रतियोगिता पनि संचालन हुने आयोजकले बताएका छन् ।

महोत्सवमा लुम्बिनी प्रदेशका सबै जिल्लाबाट नेवार संस्कृति झल्किने भेषभुषा, कला, खाद्य परिकार लगायत प्रर्दशन गरिने अयोजकको भनाई छ । जातीय भाषा, कला र संस्कृति लगायतका पहिचानको जगेर्ना गर्ने उद्धेश्यले कार्यक्रम आयोजना गरिएको नेवा: देय दवु :गुल्मीका सह सचिव कमलप्रसाद श्रेष्ठले बताए ।

“प्रदेशस्तरको यो महोत्सव यहाँ आयोजना गर्नु र १२ जिल्लाका विविधताले भरिएका भेषभुषा तथा संस्कृति यसरी साझा गर्ने अवसर भएकोले यसलाई हामी ऐतिहासिक मान्दछौँ “- श्रेष्ठले भने ।

नयाँ पुस्तामा आफ्नो धर्म, संस्कृति, भेषभुषा, कला लगायतको संचार र विस्तार गरी जीवन्त राख्न यस्ता महोत्सव तथा प्रतियोगिता फलदायी हुने नेवा देय दवु गुल्मीका अध्यक्ष तीर्थलाल श्रेष्ठ बताए ।

अध्यक्ष श्रेष्ठका अनुसार महोत्सवमा विभिन्न जिल्ला र क्षेत्रका समुहगत लाखे नाचको प्रतियोगिता समेत राखिएको छ ।प्रथम हुने समुहलाई नगद ५० हजार, द्धितियलाई ३५ हजार र तेस्रो हुनेलाई २० हजार नगदसहित सम्मान गर्ने आयोजकको तयारी छ ।

सांस्कृतिक विविधताको धनी देखिँदै आएको नेवार समुदाय गुल्मीको बलेटक्सार, रिडी, चारपाला, तमघास, वामीटक्सार,खज्र्याङ्ग लगायतका स्थानहरुमा सघन बस्ती रहेको छ ।