तानसेन तम्घास सडक दैनिक ६ घण्टा बन्द हुने

पाल्पा – तानसेन तम्घास सडक दैनिक ६ घण्टा बन्द हुने भएको छ । भोलीदेखि राती १० बजेदेखि विहान ४ बजे सम्म सडक बन्द रहने सडक डिभिजन कार्यालय पाल्पाले जनाएको छ । रातीमा दैनिक ६ घण्टा सडक बन्द गरी पाल्पाको रिब्दीकोट गाउँपालिकाको जोर्तेखण्डमा सडक स्तरोन्नती तथा मर्मत कार्य गरिने भएकाले सडक बन्द रहने सडक डिभिजनले जनाएको छ । सडक मर्मत गर्नका लागि भोलीदेखी २५ दिनसम्म सडक बन्द हुने छ ।

सो सडक हुदै गुल्मी, बाग्लुङ, अर्घाखाँचीसम्मका सवारी आवत जावत गर्ने गर्दछन् । अत्यावश्यक सवारीलाई भने अवरोध नहुने सडक डिभिजन कार्यालयका प्रमुख प्रदिपमणी निरौलाले जानकारी दिनुभयो । बिगतमा पनि पटक पटक सडक बन्द गरेर काम गरिएतापनि काम पूर्ण रुपमा सम्पन्न हुन सकेको छैन् ।

जोर्ते भीर क्षेत्रमा कडा चट्टान भएकाले कटान गर्न समय लाग्ने गरेको छ । उक्त समयमा सडक डिभिजनले सवारीलाई बैकल्पिक मार्ग लुहुङ चण्डीभन्ञ्याङ बतासेडाँडा सडक प्रयोग आग्रह गरेको छ ।