गुल्मीको एक विद्यालयमा चट्याङ लागेर आठ विद्यार्थी घाइते

गुल्मी – गुल्मीमा चट्याङ लागेर आठ जना विद्यार्थी घाइते भएका छन् । जिल्लाको मुसिकोट नगरपालिका -०६ मा अबस्थित कुर्घा निम्न माध्यमिक विद्यालयका आठ जना विद्यार्थी चट्याङ लागेर घाइते भएका हुन् । सोमबार दिउँसो तीन बजे विद्यार्थीले पढिरहेको समयमा सिमसिमे पानी सहित अचानक चट्याङ् लागेर विद्यार्थी घाइते भएको प्राधानाध्यापक मोतिप्रसाद शर्माले जानकारी दिए ।

चट्याङ लागेर ईसा घर्ती, झलका विक, अनुजा विक, अनिसा विक, सृजना शर्मा, समीक्षा थापा, बुद्धिमाया नेपाली र कल्पना विक घाइते भएको प्रधानाध्यापक शर्माले बताए । प्रधानाध्यापक शर्माका अनुसार घाइते भएका आठजना विद्यार्थीमध्ये चारजनाको स्वास्थ्य अवस्था गम्भीर रहेको छ । गम्भीर घाइते चारजना विद्यार्थीलाई थप उपचारका लागि पाल्पा पठाइएको छ ।

सामान्य घाइते भएका अन्य विद्यार्थी नजिकैको स्वास्थ्य चौकीमा उपचारपछि घर फर्किसकेका छन् । चट्याङ् पर्दा ३५/४० जना विद्यार्थीहरु एउटै कोठामा बसिरहेका थिए । घाइते भएका केही विद्यार्थीको कपाल, टाउको र कम्मर माथिको भाग जलेको छ ।