रेसुङ्गा सभाहल निर्माणको काम तिब्र

गुल्मी – गुल्मी जिल्ला सदरमुकाममा ठूला कार्यक्रम गर्न सभा हल छैनन्। सदरमुकाममा भएका केहि साना हललमा कार्यक्रमहरु हुँदै आएपनि ठूला कार्यक्रममा गर्न समस्या रहेको छ ।जसले गर्दा ठूला कार्यक्रम गर्नु परे खुल्ला चौरमा गर्नु पर्ने बाध्यता रहेको छ । यसै समस्यालाई मध्य नजर राखेर गुल्मी जिल्लाको रेसुङ्गा नगरपालिकाको वडानम्बर ४ को अर्खलेमा निर्माणधिन ‘रेसुङ्गा’ सभाहल को तिब्र गतिमा काम भइरहेको छ ।जिल्ला सदरमुकाम तम्घासमा हुने ठूला कार्यक्रमहरु गर्नका लागि सभाहल निर्माण गर्न लागिएको हो । जिल्ला सदरमुकाममा केहि निजी सभाहल बाहेक ठूला खालका सार्वजनिक सभाहल छैनन् ।

यो सभाहल निर्माँण भए जिल्ला सदरमुकाममा हुँने ठूला कार्यक्रमको लागि सहजता हुने अपेक्षा गरिएको रेसुङ्गा नगरपालिका वडानम्बर ४ का वडाअध्यक्ष लिलाधर आचार्यले बताए । जिल्लामा ठूला कार्यक्रमहरु गर्न अहिले निकै समस्या रहेको आचार्यले बताए ।ठूला सभाहलको अभावमा साना हलमा ठूला कार्यक्रमहरु गर्नुपर्ने अहिले बाध्यतालाई रेसुङ्गा सभाहले अत्य गरिदिने वडाअध्यक्ष आचार्यको भनाइ छ ।

दुईतले, भूकम्प प्रतिरोधी, भिआइपी रुम, आगो र भूकम्प प्रतिरोधात्मक, फाउन्टेन, गार्डेन र पार्किङ सुविधासहितको दुईवटा हलसहितको आधुनिक सभाहल निर्माण हुने संघीय आयोजना कार्यान्वयन इकाई भैरहवा रुपन्देहीका इन्जिनियर घनश्याम यादवले बताए।४ सय ३० जनाको क्षमता सहितको मुख्य हल निर्माण हुन लागेको हो । सभाहलमै १ सय ८ जना अटने सानो मिनी हल पनि निर्माण हुनेछ । भवन सुबिधा सम्पन्न हुने भएकाले ठूला ठूला कार्यक्रमलाई लक्षित गरेर बनाइएको यादवको भनाई छ ।

सभाहल भवनको भदौको अन्तिम सातासम्ममा ५५ प्रतिशत काम भएको निर्माण व्यवसायी धनिश्वर गौतमले बताए । उहाँका अनुसार कार्यालयबाट समयमै रकम प्राप्त भए तोकिएको समय भन्दा ६ महिना अगाडी नै सभाहलको निर्माणको काम सम्पन्न गरिने उनको भनाइ छ ।जिल्लामै अत्याधुनिक प्रबिधि सहतिको निर्माण हुने सभाल शहरी विकास मन्त्रालय अन्तर्गत संघीय आयोजना कार्यान्वयन इकाई भैरहवा रुपन्देही मार्फत काम भइरहेको छ ।

भवनको डि.एन.डी. सत्यश्वर, रकेट जेभीले निर्माणको काम गर्दै आएको हो ।सभाहलको १२ करोड, ६ लाख ९२ हजार ५९९ रुपैयाँको लागतमा निर्माण कार्य भइरहेको छ ।२०७९ साल कात्तिक २७ गते सम्झौता भइ २०८१ कात्तिक २७ गते सम्पन्न गर्नुपर्ने छ ।सभाहल भवनको तत्कालिन शहरी विकास मन्त्री रामकुमारी झाँक्रीले शिलान्यास गर्नुभएको थियो ।✍️अनिल खत्री