पर्यटकको रोजाईमा पर्न थाल्यो गुल्मीको भार्से गाउँ

गुल्मी –जिल्लाकै सवैभन्दा बढी मगर बस्ती भएको गाउँमा चिनिन्छ गुल्मीको भार्से गाउँ । लाहुरेका गाउँकारुपमा पहिचान बनाएको भार्सेगाउँमा मगर समुदायको परम्परा,रितिरिवाज,भाषा संस्कृति आफ्नै छ । मगर समुदायले कला संस्कृतिको पहिचान र गाउँमै पर्यटकलाई थप आर्कषित गर्न बौद्ध स्तूपा ,फन पार्क निर्माण गरिएको छ । पछिल्लो समय भार्से गाउँ आन्तरिक तथा बाह्रय पर्यटकको रोजाईमा पर्न थालेको छ । गुल्मी जिल्लाकै सबैभन्दा अग्लो स्थान थाप्लेको काखमा अवस्थित मनमोहक तथा प्राकृतिक सौन्दर्यले भरिपूर्ण भार्से गाउँ ।

सत्यवति गाउँपालिका–८ भार्सेको देउराली डाँडामा डेढ करोडमा बौद्ध स्तूपा निर्माण भइरहेको छ । समुन्द्री सतहदेखि दुई हजार एक सय ८० मिटर उचाईमा निर्माण भईरहेको स्पूपाको नेतृत्व भार्सेली समाज हङकङले गरेको छ । स्तूपा निर्माणमा भार्से समाज युके,भार्सेली समाज तराई क्षेत्र,भार्सेली समाज काठमाडौं लगायतका संघ संस्था र ब्यक्तिले सहयोग गरिरहेको निर्माण समिति अध्यक्ष नर बहादुर बुढाथोकीले जानाकारी दिए ।

स्तूपा निर्माण संगै भार्से गाउँलाई पर्यटन क्षेत्रमा विकास र पर्यटकलाई आर्कषणका गर्न फन पार्क निर्माण गरिएको छ । भार्से देउरालीबाट उत्तरका धौलागिरी, अन्नपूर्ण र माछापुच्छे्र लगायतका मनमोह हिमश्रृङखला र गुल्मीसहित पर्वत, बाग्लुङ, म्याग्दी, पाल्पा र स्याङजाका महत्वपूर्ण दृश्यावलोक गर्न सकिन्छ । यस गाउँको सुन्दरता र मगरसमुदाय संग रम्न पर्यटकको संख्या दैनिक बढ्दो रहेको स्थानीय सुजन गलामीले बताए ।

कला संस्कृतीको संरक्षणसंगै पर्यटकीय सम्भावना देखेर चार बर्षदेखि होमस्टे सञ्चालन गरिएको छ । होमस्टेका स्वादिष्ट कोदोको ढिँडो, सिस्नो, बाँकको गुन्द्रुक, कालो भट्ट, मकै र फापरको रोटी विशेषता हुन् । होमस्टमा पाल्ने पाहुनाको चाहना अनुसार सोरठी र कृष्णचरित्र झ्याउरे र दोहोरी प्रस्तुत गरेर पर्यटकलाई आनन्दको अनुभूति दिलाउने गर्दछन् । भार्से समुदायले देखाउने प्रस्तुती लुम्बीनी प्रदेशमै प्रख्यात मानिन्छन् । स्तूपा र पार्कसंग थाप्ले, खानीदेखि प्रसिद्ध स्थान राम पाइलालाई जोडेर पर्यटकीय विकास, यसको संरक्षण र प्रचारप्रसार अगाडी बढाउने लक्ष्य रहेको सत्यवती गाउँपालिका ८ का वडाध्यक्ष होम राना बताए । स्तूपा र फन पार्कले आन्तरिक तथा बाह्य पर्यटकको मन लोभ्याउने गरेको छ भने यता पर्यटकले भार्से गाउँलाई एक उत्कृष्ट पर्यटकीय गन्तव्यको रुपमा लिने गरेका छन् ।

हेर्नुहोस् सुन्दर रमरणीय भार्से गाउँ तस्बिरमा………….