गुल्मीमा बाँदरले सास्ती दिन थालेपछि झाडी फडानी
गुल्मी : गुल्मीमा बाँदर र बँदेलले सास्ती दिन थालेपछि झाडी फडानी सुरु भएको छ। जिल्लाको रेसुंगा नगरपालिका-१ मा बाँदर र जंगली जनावरले सास्ती पुर्याएको नागरिकले गुनासो गरेपछि वडा कार्यालयले कुकाठ र झाडी फडानी सुरु गरेको हो।
वडा कार्यालयमार्फत झाडी फडानी गरेसँगै छोरा छोरीलाई विद्यालयमा आवतजावत र बारीमा तरकारी रोप्न थप सहज हुने अपेक्षा लिएको स्थानीय सुन्तली कामीले बताइन्। ‘पहिले घनाघोर झाडी र रुखका कारण पारी गाउँ देख्न, छोराछोरी स्कुल पठाउन मुस्किल पर्थ्यो,’ उनले भनिन्, ‘वडाले झाडी र कुकाठको फडानी गरेपछि बस्तीसँगै मेरो मन समेत उज्यालो बनेको छ।’
यतिबेला घनाघोर झाडी फडानीले गाउँ उज्यालो बनेको छ। बाक्लो झाडी र कुकाठका कारण बाँदरले हैरानी दिएको र धपाउन समेत मुस्किल परेको स्थानीय शान्ता पन्थीले बताइन्। बाँदरले घर भित्र्याएको अन्नबाली सखाप बनाउने र प्रायः दुख दिने गरेको किसान बताउँछन्।
कुनै समय खेती गर्दै आएको जग्गा समेत बाँदरका कारण बाँझो राख्नुपर्ने अवस्था आएको छ। वडा कार्यालयले यस वर्ष आर्दश बोर्डिङदेखि २ नम्बर वडा कार्यालयको सिमानासम्म फडानी गरेको छ।
गतवर्ष वडा कार्यालयले ४५ दिन बाँदर हेरालु राखेर ३० हजार भुक्तानी गरेको थियो। त्यसबाट राम्रो प्रतिफल नआएपछि यस आर्थिक वर्ष कुकाठ, बाँस र झाडी फडानी गरी नागरिकलाई सहजता दिने उद्देश्य रहेको वडाध्यक्ष रामप्रसाद पन्थीले जानकारी दिए।
यस आर्थिक वर्षमा कुकाठ र झाडी फडानी गर्न वडा कार्यालय मार्फत ७० हजार विनियोजन गरिएको छ। फडानी गरेको खाली जग्गामा कागती, टिमुर,अदुवा, पिडालु, बेसार लगायतका फलफूलका बिरुवा रोप्ने वडाध्यक्ष पन्थीले बताए।
