प्रेस चौतारी गुल्मीद्वारा चिल्ड्रेन पार्कको सरसफाई

गुल्मी – प्रेस चौतारी नेपाल गुल्मीले २६ औँ स्थापना दिवस चिल्ड्रेन पार्कको सरसफाई तथा शुभकामना आदानप्रदान गरी मनाएको छ । सोमबार रेसुङ्गा नगरपालिका ९ मा अबस्थित चिल्ड्रेन पार्कमा सरसफाई गरी दिवस मनाएको हो ।

२६ औँ स्थापना दिवसको अवसरमा प्रेस चौतारी नेपालका केन्द्रिय अध्यक्ष राजेन्द्र अर्यालले शुभकामना दिदैँ सामाजिक विकासमा पत्रकारको भूमिका अतुल्यनीय रहेको बताए ।पछिल्लो समय नेपालको पत्रकारिता र मिडिया हाउसमा देखिएका समस्याबारे चर्चा गर्दै पुर्वअध्यक्ष अर्यालले गणतन्त्र, र संघीयता स्थापनामा समेत महत्वपूर्ण रहेको बताएका छन् ।

लोकतन्त्रको बलियो आधार भनेको पत्रकार जगत भएको र समाज परिवर्तनमा पत्रकारले खेलेको भूमिकाको प्रशंसा गर्दै नेकपा एमाले गुल्मीका सचिब गणेश श्रीपालीले स्थापना दिवसको अवसरमा धन्यवाद व्यक्त गरेका थिए ।

पछिल्लो समय सरकारको ठुलो लगानीमा पार्कहरु निर्माण भईरहेको र त्यसको व्यवस्थापनमा सरकारले कम चासो दिएकाले पार्कको संरक्षणमा सम्बन्धित निकायलाई ध्यानाकर्षण गराउन स्थापना दिवसको अवसरमा सरसफाइ कार्यक्रमको आयोजना गरिएको प्रेस चौतारी गुल्मीका अध्यक्ष अनिल खत्रीले बताए ।

स्थापना दिवसको अवसरमा मात्र नभई अन्य समयमा पनि प्रेस चौतारी गुल्मीले विभिन्न कार्यक्रम गर्दै आएको छ । सरसफाई तथा शुभकामना आदानप्रदान कार्यक्रमले संगठन बलियो र समाजमा रचानात्मक काम गरेर सकारात्मक सन्देश प्रवाह गरेको भन्दै सहभागीले चौतारी गुल्मीको प्रंशसा गरेका थिए । २०५५ माघ २२ गते स्थापना भएको प्रेस चौतारी नेपालले पत्रकारको हक हितमा काम गर्दै आएको छ ।