रेडियो रेसुङ्गा १७ औं वर्षमा प्रवेश

गुल्मी – गुल्मी जिल्लाको पहिलो रेडियो स्टेशन रेडियो रेसुङ्गा एफ.एम १०६.२ मेघाहर्ज आज देखि १७ औँ वर्षमा प्रवेश गरेको छ । २०६४ साल फागुन ७ गते गुल्मी जिल्लामा पहिलो रेडियो स्टेशनको रुपमा स्थापना भएको रेडियोले आफ्नो सफलतम १६ औँ वसन्त पार गरि १७ औँ वसन्तमा प्रवेश गरेको हो ।

“गाउँ देखि शहर सम्म पहाडदेखि तराई सम्म शान्ति र समानताको प्रतिक” नारा बोकी २०६४ साल फागुन ७ गते प्रजातन्त्र दिवसको अवशर पारेर स्थापना भएको रेडियोले आम नागरिकको सूचना र अधिकारको प्रत्याभुती गराउदैँ सूचना, शिक्षा संञ्चार र मनोरञ्जन प्रदान गर्ने, नेपाली कला साहित्य सिर्जना र संस्कृतिको संरक्षण गर्ने, शान्ति र समतामूलक समाजको निर्माणमा सहयोग जुटाउने, सामाजिक विकृति विषङ्गति विरुद्ध चेतना जगाउने लगायतका विभिन्न उद्देश्य राखि स्थापना भएको रेडियोले लाखौँ स्रोताको मन जित्न सफल भएको छ ।

गुल्मी जिल्लाको सदरमुकाम तम्घास स्थीत नयाँ बजारमा स्टुडियो रहेको रेडियोले समुद्री सतहबाट २ हजार मिटर उचाईमा रहेको अर्जुनडाँडा स्थित आफ्नै टावरबाट सेवा प्रसारण गर्दै आएको छ । निजि क्षेत्रबाट कम्पनि ऐन अन्तर्गत सञ्चालन भएपनि रेडियोले सामुदायिक रेडियो सरह आफ्ना समाचार र विषय वस्तुलाई स्थान दिदैँ आएको छ । गुल्मी जिल्लाका व्यवसायी, वुद्धिजिवि र संञ्चारकर्मीको संयुक्त पहलमा ५० जना महानुभावहरुको यस रेडियोमा लगानी रहेको छ ।

रेडियोले मुख्यतःआफ्नो गाउँठाउँ र समाजमा रहेका समुदायको आवश्यकतालाई मध्यनजरमा राख्दै आफ्ना कार्यक्रमहरुलाई सञ्चालन गर्दै आएको छ । रेडियोले प्रसारण गर्ने हरेक कार्यक्रमहरु सबै क्षेत्र र समुदायलाई लक्ष्यित गरि तयार गर्ने गरेको छ । यसले संञ्चार, विकास र चेतनाले पछाडि परेका क्षेत्रका समुदायहरुलाई पहिलो प्राथमिकतामा राखेर आफ्नो कार्यक्रमहरु उत्पादन र प्रशारण समेत गदै आएको छ ।

वार्षिक उत्सवको अवसर पारेर रेडियोले भोली प्रत्येक वार्षिकोत्सवको अवसरमा अर्जुन भगवती मन्दिरमा गर्दै आएको पूजाआजा तथा रेडियोका सञ्चालक र कर्मचारीबीच अन्तरक्रिया कार्यक्रम गरी मनाउन लागिएको रेडियो सञ्चालक समितिका अध्यक्ष हरिकुमार श्रेष्ठले जानकारी दिए ।

रेडियोका स्टेशन म्यानेजर अनिता खत्रीले रेडियोलाई थप नयाँ प्रविधिसंग जोड्दै समयसापेक्ष रुपमा रपान्तरण गरेर लैजाने बताउनुभएको छ । पाँच सय वाट क्षमता रहेको रेडियो दैनिक १८ घण्टा प्रसारण हुँदै आएको छ । बालक देखि बृद्धसम्म लोकप्रिय बन्दै आएको रेडियो गुल्मी जिल्लासँगै छिमेकी जिल्लाहरु र इन्टरनेट अनलाईन तथा रेडियोको आफ्नै मोबाइल एम्पलिकेशद्धारा संसारैभर सुन्न सकिन्छ ।