मालिकाको नीति तथा कार्यक्रम :´एक वडा, दुई उत्पादन`



गुल्मी – गुल्मीको मालिका गाउँपालिकाले कृषि,रोजगारी , शिक्षा र पर्यटनलाई प्राथमिकतामा राखेर आगामी आर्थिक वर्ष २०८१/०८२ का लागि नीति तथा कार्यक्रम प्रस्तुत गरेको छ। बिहिवार मालिका गाउँपालिकाको सोह्रौं गाउँसभामा गाउँपालिका अध्यक्ष देविराम अर्यालले नीति तथा कार्यक्रम पेश गरेका हुन् ।

आगामी आर्थिक बर्षको नीति तथा कार्यक्रममा कृषितर्फ “एक वडा,दुई उत्पादन”को नीति ल्याएको गाउँपालिका अध्यक्ष अर्यालले बताए । गाउँपालिकाले पालिकाभित्रका ८ वटा वडाका कृषकलाई कृषिमा व्यावसायिक बनाउने लक्ष्यका साथ प्रत्येक वडामा फरकफरक कृषि उपज उत्पादनको ल्याएको छ ।


Advertisement

एक वडा दुई उत्पादन कार्यक्रम अन्तर्गत वडा नम्बर १ नेटामा बंगुर र मौरी पालन, २ दर्लिङ्गमा बाख्रा पालन  र आलु उत्पादन , ३ ह्वाङ्ग्दीमा बाख्रा र उखु , ४ अर्खाबाङ्गमा आलु र मकै उत्पादनमा जोड दिइएको छ । त्यस्तै वडा नम्बर  ५ छापहिलेमा बाख्रा र हलुवावेद उत्पादन , ६ अर्जैमा मौरी र धान उत्पादन ,  ७ घमिरमा केरा र कफी उत्पादन र ८ मर्भुङ्गमा बेसार र कफी उत्पादन लाई व्यवसायिक रुपमा संचालन गरिने नीति तथा कार्यक्रममा उल्लेख गरिएको छ ।

गाउँपालिकाले बढ्दो बसाइँसराइका कारण बाझिएका जमिनमा कृषि खेती प्रवर्द्धन गर्न युवा लक्षित सहकारी तथा सामुदायिक खेती प्रणालीलाई प्रोत्साहन गर्ने नीति ल्याएको छ । गाउँपालिकालाई  अर्गानिक पालिकाको रुपमा स्थापित गर्नको लागि सबै ८ वटामा भर्मिक कम्पोस्ट  र झोलमोल बनाउने  योजना बनाएको छ । तरकारीमा पालिकालाई आत्मनिर्भर बनाउने उद्देश्यका अनुरुप “एक घर, एक करेशाबारी”कार्यक्रम संचालन गरिने पालिका अध्यक्ष अर्यालले बताए ।

पुष्पजन्य व्यवसायलाई प्रवर्द्धन गर्दै गाउँपालिका भित्र संचालन हुने सम्पूर्ण सार्वजनिक कार्यक्रमहरुमा फूलहरुको प्रयोग र व्यवसायिक उत्पादन बढाउन “एक घर,एक बगैचा”कार्यक्रमसंचालन गरिने भएको छ । उत्पादनमा आधारित अनुदान कार्यक्रममा निरन्तरता दिदै कृषकलाई आवश्यक मागमा आधारित तालिम संचालन गरिने अध्यक्ष अर्यालले बताए ।

पशु तथा बाली स्वास्थ्यलाई मध्यनजर गरेर प्रत्येक  वडामा पशु स्वास्थ्य शिविर तथा बालि संरक्षण कार्यक्रम संचालन गर्ने र जंगली बन्यजन्तुले पुर्याएको क्षति न्यूनीकरण गर्न सम्बन्धित निकायसँग समन्वयमा बाली संरक्षणको लागि आवश्यक व्यवस्था गरिने नीति तथा कार्यक्रममा उल्लेख गरिएको छ।

कृषि र पशुपंक्षि क्षेत्रमा उत्पादन वा प्रविधि हस्तान्तरणमा उदाहरणीय योगदान पुर्याउने कृषकलाई सम्मान तथा गाई गोरुपालन गर्ने कृषकलाई प्रोत्साहन गरिने पालिकाले नीति ल्याएको छ ।

यो पढेपछि तपाईलाई कस्तो लाग्यो ?


गुल्मी खबर
गुल्मी खबर डट कम २०८० चैत्र २० गतेबाट नागरिक सन्देश मिडिया प्रा.लि. द्वारा संचालित नेपाली भाषाको अनलाइन समाचार पोर्टल हो ।गुल्मी खबर डट कममा प्रकाशित सामाग्री बारे कुनै गुनासो, सूचना तथा सुझाव भए हामीलाई ([email protected]) मा मेल पठाउन वा ९८५७०६७७३८ फोन गर्न सक्नुहुने छ ।

Advertisement
विज्ञापन