गुल्मीको मदाने गाउँपालिकाले ल्यायो ५० करोड बजेट

 गुल्मी – गुल्मीको मदाने गाउँपालिकाले आगामी आर्थिक वर्ष २०८१/०८२ को लागि बजेट सार्वजनिक गरेको छ। गाउँपालिका उपाध्यक्ष सरिता खड्का केसीले ५० करोड ३८ लाख ९२ हजार रुपैयाँको बजेट गाउँसभामा पेश गरेकी हुन् । यसवर्ष गाउँपालिकाले कृषि, पर्यटन , स्वास्थ्य, शिक्षा, र पूर्वाधार विकासलाई प्राथमिकतामा राखेर बजेट विनियोजन गरिएको गाउँपालिका उपाध्यक्ष खड्काले जानकारी दिइन् ।

गाउँपालिकाले चालु तर्फ ३० करोड २१ लाख ३५ हजार २ सय पुजिँगत तर्फ २० करोड १७ लाख ५६ हजार ८ सय बिनियोजन गरेको छ । गाउँ सभाको १५ औं अधिबेशनमा गाउँपालिका अध्यक्ष महेन्द्र बहादुर कुवँरको अध्यक्षतामा आम्दानीतर्फ संघीय समानिकरणमा ९ करोड २३ लाख, संघ राजस्व बाँडफाँडमा ९ करोड एक लाख  प्रदेश समानिकरणमा ६९ लाख ८० हजार, प्रदेश राजस्व बाँडफाँडमा ४१ लाख रुपैयाँ आन्तरिक स्रोत राजश्व ३६ लाख रुपैयाँ अनुमान गरिएको छ ।

आर्थिक वर्ष २०८१/८२ को लागि शिक्षा तर्फ २ करोड ५७ लाख ३० हजार रुपैयाँ, स्वास्थ्य तर्फ ७५ लाख ६८ हजार , कृषितर्फ ५० लाख ५० हजार रुपैयाँ बजेटको अनुमान गरिएको छ । त्यस्तै पशु विकास तर्फ ३० लाख ५० हजार रुपैयाँ,सामाजिक विकास तर्फ २ करोड ३१ लाख रुपैयाँ बजेट विनियोजन गरिएको छ ।

‘समुन्नत मदाने, सम्मानित मदानेबासी’को नारा बोकेको मदाने गाउँपालिकाले  उपलब्ध स्रोत, साधन, पुँजी, सिप एवं प्रविधिको प्रयोग गरेर विकास निर्माणको काममा जोड लक्ष्य लिएको छ । आगमि बर्षको नीति तथा कार्यक्रममा स्वास्थ्य ,शिक्षा,कृषि ,पर्यटन,खानेपानी ,युवालाई रोजगार ,बिद्युत ,अपाङ्ग,बालबालिका तथा महिला लगाएतका बिभिन्न क्षेत्रको बिकाशलाई जोड दिदैँ निति तथा कार्यक्रम प्रस्तुत गरिएको थियो ।