नेपाल लाइफले दियो बिद्यार्थीलाई झोला र शैक्षिक सामाग्री

गुल्मी – नेपाल लाइफ इन्स्योरेन्स कम्पनी गुल्मी उप शाखाले बिद्यार्थीलाई शैक्षिक सामाग्री र झोला वितरण गरेको छ । संस्थागत सामाजिक उत्तरदायित्व कार्यक्रम अन्तर्गत जिल्लाको रेसुङ्गा नगरपालिका –९ मा अबस्थित उपल्लो तम्घास माध्यमिक बिद्यालयमा अध्ययनरत बहिरा तथा बौद्धिक अपांगता भएका विद्यार्थीलाई सामाग्री वितरण गरेको हो । यस सामुदायिक विद्यालयमा अध्ययनरत बहिरा तथा बौद्धिक अपंगता भएका विद्यार्थीलाई पढाईमा थप हौसला प्रदान गर्न झोला र शैक्षिक सामग्री वितरण गरिएको गुल्मी उपशाखाका सहायक मदन भण्डारीले जानकारी दिए ।

बिहीबार इन्स्योरेन्स कम्पनीले एक समारोहका बीच यस विद्यालयमा अध्ययन गर्ने ३२ जना विद्यार्थीलाई झोला र शैक्षिक सामाग्री वितरण गरेको हो । उपल्लो तम्घास माध्यमिक विद्यालयमा जिल्लाका १२ स्थानीय तहका २० जना बहिरा र १२ जना बौद्धिक अपांगता भएका विद्यार्थीले अध्ययन गर्दै आएको विद्यालयका प्रधानाध्यापक मधु गौतमले जानकारी दिए । उनले सामाजिक उत्तरदायित्व अन्तर्गत यस विद्यालयलाई छनोट गरी बिद्यार्थीलाई सहयोग प्रदान गरेकोमा इन्स्योरेन्स कम्पनीलाई धन्यबाद दिए । प्रधानाध्यापक गौतमले बौद्धिक अपांगता तथा बहिरा बिद्यार्थीहरुलाई समाजका सबै क्षेत्रको सहयोग उत्तिकै रहेको बताए ।

संस्थागत सामाजिक उत्तरदायित्व कार्यक्रम अन्तर्गत नेपाल लाइफले गरेको काम उदारहणीय र प्रशंसायोग्य रहेको रेसुंगा नगरपालिका –९ का वडाध्यक्ष कृष्ण पाण्डेले बताए । वडाध्यक्ष पाण्डेले राज्यका सबै अङ्गले सामाजिक क्षेत्रमा सहयोग गर्न जरुरी रहेको बताए । ‘बीमा जोखिम व्यवथापनको एक महत्वपूर्ण औजार हो,’ ‘वडाध्यक्ष पाण्डेले भने’, ‘आम्दानीको केहि प्रतिशत रकम बीमामा लगानी गर्न सकेमा जीबनमा आइपर्ने अप्ठ्यारो परिस्थितीमा साहारा र पैसाको बचत हुन्छ, त्यसैले बीमाले सुखमा मद्दत र दुःख जोखिम वहन गर्छ ।’

नेपाल लाइफ इन्स्योरेन्स कम्पनी गुल्मी उपशाखा प्रमुख हरि बहादुर केसीले बिद्यार्थीहरुको उज्वल भविष्य र पढाईमा थप टेवा दिने हेतुले निरन्तर उत्तरदायित्व बहन गर्दै आइरहेको जानकारी दिए । उनले इन्स्योरेन्स कम्पनीले सबै समुदायका गरिब,विपन्न र असाहय विद्यार्थीलाई शिक्षाको पहुँचमा पुर्याउन शैक्षिक सामाग्री र झोला सहयोग गरिएको बताए । उपशाखा प्रमुख केसीले मानविय समाजमा विपत्ति, जोखिमका अनेकौँ सम्भावनाहरु जहि तहि रहेकाले समयमै बीमा गरी जीवनमा हुने हानी नोक्सानीमा यसबाट फाइदा लिन आग्रह गरे ।

कम्पनीले गरेको झोला र शैक्षिक सामाग्री वितरणले बिद्यार्थीको पढाईमा गुणस्तर वृद्धि र सामुदायिक बिद्यालय तर्फको आकर्षण बढाउन थप टेवा पुग्ने अपेक्षा लिइएको छ । पछिल्लो समयमा यस उपल्लो तम्घास माध्यमिक बिद्यालयमा  बिभिन्न संघ संस्थाहरुले  बिभिन्न अबसर पारेर सहयोग गर्ने गर्न थालेका छन् ।