गुल्मीको मुसिकोट १ मा मतदान जारी,मतदाताको लाइन

गुल्मी – आइतबार बिहान ७ बजेदेखि गुल्मीको मुसिकोट नगरपालिका -१ मा वडाध्यक्ष पदका लागि मतदान सुरु भएको छ । वडाअध्यक्षका निर्वाचनका लागि ३ वटा मतदान स्थल र ५ वटा मतदान केन्द्र तोकिएको मुख्य निर्वाचनको कार्यालयका सहायक निर्वाचन अधिकृत ऋषिराम घिमिरेले जानकारी दिए । वडामा ४ हजार ५१ जना मतदाता रहेका छन् ।

वडाअध्यक्ष का लागि ८ जना चुनावी प्रतिस्पर्धामा छन् । नेपाल कम्युनिस्ट पार्टी ( नेकपा एमाले) बाट दलबहादुर थापा, नेपाली काङ्ग्रेसको तर्फबाट आनन्द श्रेष्ठ, नेपाल कम्युनिस्ट पार्टी ( माओवादी केन्द्र) बाट दुर्गा बहादुर बिक उम्मेदवार छन् । त्यस्तै यस उप- निर्वाचनमा देशको चौथो दल राष्ट्रिय स्वतन्त्र पार्टीले पनि वडाध्यक्षमा आफ्नो उम्मेदवार उठाएको छ । रास्वपाबाट विकास थापा प्रतिस्पर्धामा छन् ।

त्यस्तै राष्ट्रिय प्रजातान्त्र पार्टीले इश्वरी खाती क्षेत्रीलाई  उम्मेदवार बनाएको छ । वडाध्यक्ष पदमा तीन जना स्वतन्त्र उम्मेदवार प्रतिस्पर्धामा छन् । स्वतन्त्रतर्फ कुल बहादुर थापा, पोमानन्द खरेल र योगेन्द्र खनाल रहेका छन् ।  नेपाली काङ्ग्रेसलाई आफ्नो  साख जोगाउन पर्ने छ भने एमाले आफ्नो जीत निकाल्ने डौडमा छ । जिल्लाको एक वडामा मात्रै उप-निर्वाचन हुन लागेकाले यसलाई जिल्लामै एक महत्त्व र आफ्ना पार्टीको गौरव संग हेरिएको छ ।

त्यस वडामा नेपाली कांग्रेसबाट वडाअध्यक्ष पदमा निर्वाचित मोहन घिमिरेको २०८० भदौ २ गते निधन भएको थियो ।  वडाध्यक्षको रिक्त पदमा अहिले उपनिर्वाचन गरिएको हो ।

निर्वाचन आयोगले मतदानका लागि आज बिहान ७ देखि साँझ ५ बजेसम्मको समय तोकेको छ। निर्वाचन आयोगले सुरक्षाको पूर्ण प्रत्याभूति दिलाउने गरी सुरक्षा व्यवस्था मिलाइएका कारण निर्धक्कसाथ मतदानमा सहभागी हुन मतदातालाई आग्रह गरेको छ।