गुल्मीको मुसिकोट १ मा १० प्रतिशत मत खस्यो
गुल्मी – आइतबार बिहान ७ बजेदेखि गुल्मीको मुसिकोट नगरपालिका -१ मा वडाध्यक्ष पदका लागि मतदान भइरहेको छ । ९ बजे १५ मिनेटसम्म मुसिकोट -१ मा १० प्रतिशत मत खसेको छ । चार सय ४९ मत खसेको निर्वाचन कार्यालयले जनाएको छ ।
खसेको मत संख्याको आधारमा यो १० प्रतिशत हुन आउने मुख्य निर्वाचनको कार्यालयका सहायक निर्वाचन अधिकृत ऋषिराम घिमिरेले जानकारी दिए ।
वडाअध्यक्षका निर्वाचनका लागि ३ वटा मतदान स्थल र ५ वटा मतदान केन्द्र तोकिएको छ । वडामा ४ हजार ५१ जना मतदाता रहेका छन् ।
वडाअध्यक्ष का लागि ८ जना चुनावी प्रतिस्पर्धामा छन् । नेपाल कम्युनिस्ट पार्टी ( नेकपा एमाले) बाट दलबहादुर थापा, नेपाली काङ्ग्रेसको तर्फबाट आनन्द श्रेष्ठ, नेपाल कम्युनिस्ट पार्टी ( माओवादी केन्द्र) बाट दुर्गा बहादुर बिक उम्मेदवार छन् । त्यस्तै यस उप- निर्वाचनमा देशको चौथो दल राष्ट्रिय स्वतन्त्र पार्टीले पनि वडाध्यक्षमा आफ्नो उम्मेदवार उठाएको छ । रास्वपाबाट विकास थापा प्रतिस्पर्धामा छन् ।
त्यस्तै राष्ट्रिय प्रजातान्त्र पार्टीले इश्वरी खाती क्षेत्रीलाई उम्मेदवार बनाएको छ । वडाध्यक्ष पदमा तीन जना स्वतन्त्र उम्मेदवार प्रतिस्पर्धामा छन् । स्वतन्त्रतर्फ कुल बहादुर थापा, पोमानन्द खरेल र योगेन्द्र खनाल रहेका छन् । नेपाली काङ्ग्रेसलाई आफ्नो साख जोगाउन पर्ने छ भने एमाले आफ्नो जीत निकाल्ने डौडमा छ । जिल्लाको एक वडामा मात्रै उप-निर्वाचन हुन लागेकाले यसलाई जिल्लामै एक महत्त्व र आफ्ना पार्टीको गौरव संग हेरिएको छ ।
त्यस वडामा नेपाली कांग्रेसबाट वडाअध्यक्ष पदमा निर्वाचित मोहन घिमिरेको २०८० भदौ २ गते निधन भएको थियो । वडाध्यक्षको रिक्त पदमा अहिले उपनिर्वाचन गरिएको हो ।
