गुल्मीको मुसिकोट १ मा मतदान सकियो ,५७ प्रतिशत मत खस्यो

गुल्मी – गुल्मीको मुसिकोट नगरपालिका वडा नम्बर १ मा वडाध्यक्ष चयनका लागि भएको मतदान सकिएको छ । मुख्य निर्वाचनको कार्यालयका सहायक निर्वाचन अधिकृत ऋषिराम घिमिरेका अनुसार ५७ दशमलव ०५ प्रतिशत मत खसेको छ ।

वडामा ४ हजार ९१ जना मतदाता रहेका छन् । दुई हजार तीन सय ३४ कुल मत खसेको छ । जसमा एक हजार ४० पुरुष  र एक हजार दुई सय ९४ महिलाले मतदान गरेका छन् ।

मतदान निर्धारित समय अगावै मतदान सकिए लगत्तै अहिले मत पेटिका मुख्य निर्वाचनको कार्यालयमा ल्याइएको सहायक निर्वाचन अधिकृत घिमिरेले बताए । अहिले सबै मतदान केन्द्रबाट मत पेटीका मतगणना हुने स्थल पौदीअमराई वडा कार्यालयमा ल्याइदैछ । मतपेटीकाहरु सवै ल्याएपछि सर्वदलीय बैठक बसेर मतगणना आजै गरिने उनले बताए । मत गणना को लागि लागीस्थल पौदीअमराईमा तयारी पनि सकिएको छ ।

आज रातिबाट नै परिणाम आउन सुरु गर्ने निर्वाचन आयोगले जनाएको छ ।वडाअध्यक्षका निर्वाचनका लागि ३ वटा मतदान स्थल र ५ वटा मतदान केन्द्र तोकिएको थियो । वडाअध्यक्ष का लागि ८ जना चुनावी प्रतिस्पर्धामा छन् ।

नेपाल कम्युनिस्ट पार्टी ( नेकपा एमाले) बाट दलबहादुर थापा, नेपाली काङ्ग्रेसको तर्फबाट आनन्द श्रेष्ठ, नेपाल कम्युनिस्ट पार्टी ( माओवादी केन्द्र) बाट दुर्गा बहादुर बिक उम्मेदवार छन् । त्यस्तै यस उप- निर्वाचनमा देशको चौथो दल राष्ट्रिय स्वतन्त्र पार्टीले पनि वडाध्यक्षमा आफ्नो उम्मेदवार उठाएको छ । रास्वपाबाट विकास थापा प्रतिस्पर्धामा छन् ।

त्यस्तै राष्ट्रिय प्रजातान्त्र पार्टीले इश्वरी खाती क्षेत्रीलाई  उम्मेदवार बनाएको छ । वडाध्यक्ष पदमा तीन जना स्वतन्त्र उम्मेदवार प्रतिस्पर्धामा छन् । स्वतन्त्रतर्फ कुल बहादुर थापा, पोमानन्द खरेल र योगेन्द्र खनाल रहेका छन् ।

त्यस वडामा नेपाली कांग्रेसबाट वडाअध्यक्ष पदमा निर्वाचित मोहन घिमिरेको २०८० भदौ २ गते निधन भएको थियो । वडाध्यक्षको रिक्त पदमा अहिले उपनिर्वाचन गरिएको हो । आइतबार बिहान ७ बजेदेखि सुरु भएको मतदानमा शान्त र मर्यादित रुपमै सम्पन्न भएको छ ।