गुल्मीको रेसुङ्गामा आन्तरिक रोजगारीबारे अन्तरक्रिया

गुल्मी – गुल्मीमा आन्तरिक रोजगारीको वर्तमान अवस्था, चुनौती र सम्भावनाहरू विषयक अन्तरक्रिया कार्यक्रम गरिएको छ । रेसुंगा नगरपालिकाको आयोजनामा बिहिबार प्रधानमन्त्री रोजगार कार्यक्रम अन्तर्गत रोजगारदाता, उद्योगी, व्यवसायी, विद्यार्थी र विभिन्न सरोकारवाला निकायका प्रतिनिधिहरुको सहभागितामा उक्त कार्यक्रम गरिएको हो । आन्तरिक रोजगारीको वर्तमान अवस्था, चुनौती र सम्भावनाहरू विषयमा सहभागिले केही महत्वपूर्ण सुझाव सहितका जिज्ञासा राखेका थिए ।

उनीहरुले पछिल्लो समय देशमा वैदेशिक रोजगारी र बसाइसराईका कारण आन्तरिक रोजगारी उपेक्षित बनेकोमा चिन्ता व्यक्त गरे । सहभागी राजु कुँवरले कृषि व्यवसायीकरण, स्थानीय पर्यटन प्रवद्र्धन, उपज प्रशोधन केन्द्र निर्माण, सीपमूलक तालिम र ‘रेसुंगा युवा फोरम’ गठनजस्ता कार्यक्रम आवश्यक रहेको बताए । पढ्दै–कमाउँदै गर्ने कार्यक्रम कम प्रभावकारी भएको उल्लेख गर्दै रेसुंगा बहुमुखी क्याम्पसका स्ववियु सभापति सुदीप खत्रीले विद्यार्थीहरू रोजाईमा विदेश भइरहेकाले उनीहरूको सीप र ज्ञानको सही प्रयोग गरी स्वदेशमै अवसर दिनुपर्नेमा जोड दिए ।

त्यस्तै अन्तरक्रिया कार्यक्रममा विद्यार्थी नेता निशान टण्डनले स्थानीय उत्पादनको ब्रान्डिङमा जोड दिँदै रेसुङ्गामा जडीबुटीबाट बनाइने चिया र त्यस क्षेत्रमा पाइने जडीबुटीलाई व्यवसायिक बनाउन सकेपनि आन्तरिक रोजगारीमा थप टेवा पुग्ने बताए । जिल्ला सहकारी संघका अध्यक्ष यमबहादुर थापाले कोल्ड स्टोर निर्माण, अनुसन्धान शाखा स्थापना लगायत आन्तरिक स्रोत सुदृढीकरणमा ध्यान दिनुपर्ने सुझाव दिए ।

कार्यक्रममा सहभागीहरुले पुँजी परिचालनको चुनौती, परियोजनाको अभाव, तरलता व्यवस्थापनको समस्याहरु राखेका थिए । अहिले देशमा दक्ष जनशक्तिको अभाव, स्वरोजगारप्रति युवाको रुचि कमी, र स्थानीय तहको अनुदान प्रभावकारितामा कमजोर भएको कृषि उद्यमी प्रेम नेपालीले गुनासो गरे । नेपालीले विद्यालयमा कृषि बिषयमा राम्रो पढाई हुने भएपनि युवा र विद्यार्थीको रोजाई नै विदेश हुने गरेको बताए ।

रेसुंगा नगरपालिकाका नगरप्रमुख खिलध्वज पन्थीेले अहिले नगरपालिकाले मानव पुँजी र पूर्वाधार विकासलाई प्राथमिकता दिंदै अगाडी बढेको बताए । उनले जिल्लामा पर्यटन विकास र रेसुंगा क्षेत्रको महिमा उजागर गरेर पर्यटन प्रवद्र्धनका लागि “जाउँ हिँड रेसुंगा” अभियान संचालन गरिरहेको सुनाए । नगरपालिकाले पर्यटन,भौतिक सहित मानवीय विकासका आयामलाई पनि अगाडी सारिएको नगरप्रमुख पन्थीले उल्लेख गरे ।

“समुन्नत रेसुंगा हाम्रो सान,उत्कृष्ट नगर सबैको पहिचान”को नारा बोकेको रेसुंगा नगरपालिकाले आगामी आर्थिक वर्षको नीति तथा कार्यक्रममा स्वास्थ्य,शिक्षा,कृषि,पर्यटन र भौतिक पूर्वाधार विकासलाई विशेष प्राथमिता दिएको छ । कार्यक्रममा रेसुंगा बहुमुखी क्याम्पसका उपप्रध्यापक गुणानिधि शर्माले आन्तरिक रोजगारको वर्तमान अवस्था र सरकारी प्रयासहरू बारे प्रस्तुति दिएका थिए ।