गुल्मीको धुर्कोट गाउँपालिका बालश्रम तथा सडक बालबालिकामुक्त घोषणा

गुल्मी – गुल्मीको धुर्कोट गाउँपालिकालाई बालश्रम तथा सडक बालबालिकामुक्त पालिकाका रूपमा घोषणा गरिएको छ । आवश्यक प्रक्रिया र सूचकहरू पुरा गर्दै यस्तो घोषणा गर्नेमा धुर्कोट जिल्लामै पहिलो पालिका बनेको हो । गाउँपालिकाको १७ औँ गाउँसभा अधिवेशनको चौथो बैठकमा गाउँपालिका अध्यक्ष भूपाल पोखरेलले औपचारिक रूपमा पालिकालाई बालश्रम तथा सडक बालबालिकामुक्त घोषणा गरेका हुन् । अध्यक्ष पोखरेलले घोषणासँगै बालबालिकाको अधिकार, संरक्षण र समग्र विकासलाई अझ बलियो बनाउने प्रतिबद्धता व्यक्त गरे ।

धुर्कोट गाउँपालिकाले २०८१ साउन २७ गतेदेखि बालमैत्री स्थानीय राष्ट्रिय महाअभियानको पालना गर्दै बालबालिकाको हितका लागि संस्थागत सुधारमा गाउँपालिका लागि परेको पालिका अध्यक्ष पोखरेलले बताए । उनले संस्थागत सुधार र सेवा प्रवाहलाई प्राथमिकतामा राखेर अगाडी बढेकाले धुर्कोटलाई पहिलो पटक बालश्रम तथा सडक बालबालिकामुक्त घोषणा गर्न सफल भएको उल्लेख गरे ।

पालिकाले बालश्रममुक्त स्थानीय तह घोषणा कार्यविधि, २०७७ अन्तर्गतको सबै प्रक्रिया— वडागत निर्णय, अनुगमन, मूल्याङ्कन, र सूचकहरूको परिपूर्ति पूरा गरेपछि मात्र औपचारिक घोषणा गरिएको बताइको छ । पालिकाले नेपालको संविधानको धारा ३९ मा उल्लेखित बालबालिकाको मौलिक हक, स्थानीय सरकार सञ्चालन ऐन २०७४, र बालमैत्री स्थानीय शासन कार्यान्वयन निर्देशिका २०७८ अनुसार सेवा प्रवाह र संस्थागत संरचनाहरू विकास गरेको गाउँपालिका उपाध्यक्ष सीता गिरीले बताईन् ।

पालिकाले बालश्रम र सडक बालबालिकामुक्त घोषणाका लागि सबै मापदण्ड पुरा गरेको बताउँदै उपाध्यक्ष गिरीले अब बालमैत्री पालिका पनि बन्ने दिशामा अघि बढेको जानकारी दिईन् । पालिकाले विद्यालय, परिवार, स्थानीय संस्था र समुदायसँग सहकार्य गर्दै बालमैत्री वातावरण निर्माणमा विशेष जोड दिने जनाएको छ । नेपाल सरकारले सबै स्थानीय तहलाई बालमैत्री बनाउनका लागि राष्ट्रिय रणनीति ल्याएको छ । सोही रणनीति अनुसार स्थानीय तहहरूले बालश्रम, बालअवस्था शिक्षा अभाव, तथा सडक बालबालिकाको समस्यालाई अन्त्य गर्न कार्यक्रमहरू सञ्चालन गर्दै आएका छन् ।