गुल्मीमा छल्दी खोलाले बगाउँदा एक जनाको मृत्यु
गुल्मी – गुल्मीको इस्मा गाउँपालिकामा छल्दी खोलाले बगाउँदा एक जना पुरुषको मृत्यु भएको छ। इस्मा गाउँपालिका–१ राहलेका ५३ वर्षीय मानबहादुर कुमालको मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक (डिएसपी) गंगाबहादुर सारूले जानकारी दिए। । प्रहरी नायब उपरीक्षक सारुका अनुसार, बुधबार रातिदेखि सम्पर्कविहीन रहेका कुमालको शव सोही गाउँपालिकाको वडानम्बर –२ स्थित छल्दी खोलाको किनारमा भेटिएको थियो ।
उनको शवलाई स्थानीय माछा मार्ने व्यक्तिले देखेपछि प्रहरीलाई खबर गरेका थिए। शुक्रबार बिहान फेला परेका मृतक कुमालले मानसिक सन्तुलन समेत गुमाएको हुन सक्ने प्रहरीले जनाएको छ । घटनाबारे जानकारी पाएलगत्तै हस्तिचौर र धनार्जी प्रहरी चौकीबाट टोली खटिएको थियो।
प्रहरीले मुचुल्का उठाई शवलाई पोस्टमार्टमका लागि जिल्लाको सदरमुकाम तम्घासस्थित गुल्मी अस्पतालमा लैजाने तयारी भईरहेको बताईएको छ । यस घटनाबारे थप अनुसन्धानका लागि जिल्ला प्रहरी कार्यालय गुल्मीबाट प्रहरी निरीक्षकसहितको विशेष टोली खटाइएको छ।
