घमिर खेलकुद तथा सांस्कृतिक युवा क्लवको नयाँ समिति गठन
भदौ ११, गुल्मी – घमिर खेलकुद तथा सांस्कृतिक युवा समूहले नयाँ कार्यसमिति गठन गरेको छ। सोमबार घमिर भानुपोखरामा बसेको बैठकले व्यापक छलफलपछि सर्वसम्मत नयाँ नेतृत्व चयन गरेको हो।
नयाँ कार्यसमितिको अध्यक्षमा सुमन पन्थी चयन भएका छन्। उपाध्यक्षमा पुस्कर खत्री, सचिवमा गोविन्द कार्की, सह–सचिवमा नारद अर्याल र कोषाध्यक्षमा रोशना लम्साल (कार्की) रहेका छन्। अध्यक्ष पन्थी विगत केही वर्षदेखि सञ्चारकर्मसँगै सामाजिक सेवामा सक्रिय रहँदै आएका छन्।
त्यस्तै, सदस्यमा लोकेन्द्र कार्की, मिलन कार्की, अनिल परियार, नारायण पन्थी, पुष्पा बन्जाडे, टिकाराम घिमिरे, उमा कार्की, विष्णुमाया रोका मगर र शिवकुमारी कार्की रहेका छन्। बैठकले समितिबाट हुने सम्पूर्ण आम्दानी–खर्च विवरण सार्वजनिक गर्ने निर्णयसमेत गरेको छ।
समूहले स्थापना कालदेखि नै ग्रामिण क्षेत्रमा खेलकुद र सांस्कृतिक कार्यक्रमहरू सञ्चालन गर्दै आएको छ। यसै क्रममा आगामी बडादशैँ र तिहारलाई लक्षित गर्दै खुला वडा स्तरीय पुरुष भलिबल र खुला फुटबल प्रतियोगिता आयोजना गर्न लागेको सचिव कार्कीले जानकारी दिए।
उनका अनुसार असोज २१ देखि २५ गतेसम्म हुने प्रतियोगितामा भलिबलतर्फ प्रथम हुने टोलीलाई ५० हजार रुपैयाँ, ट्रफी, मेडल र प्रमाणपत्र प्रदान गरिनेछ। द्वितीय टोलीले ३० हजार रुपैयाँ, ट्रफी, मेडल र प्रमाणपत्र पाउनेछ। फुटबलतर्फ प्रथम पुरस्कार ४० हजार रुपैयाँ, र द्वितीय पुरस्कार २५ हजार रुपैयाँ रहने छ।
प्रतियोगितामा सहभागी हुन भलिबलतर्फ ५ हजार रुपैयाँ र फुटबलतर्फ ४ हजार रुपैयाँ टिम दर्ता शुल्क तोकिएको छ। भलिबल प्रतियोगितामा प्रत्येक टिमले दुई जना बाहिरी खेलाडी खेलाउन सक्ने व्यवस्था गरिएको आयोजकले जनाएको छ।
